சுற்றுலாத்துறையில் புதிய உச்சம்: SLTDA வெளியிட்ட அதிரடித் தகவல்!

நடப்பு ஆண்டின் இதுவரையிலான காலப்பகுதியில் 990,000 க்கும் அதிகமான சுற்றுலாப் பயணிகள் இலங்கைக்கு வருகை தந்துள்ளதாக இலங்கை சுற்றுலா அபிவிருத்தி அதிகார சபை (SLTDA) தெரிவித்துள்ளது.

அதன்படி, கடந்த ஜனவரி 1 ஆம் திகதி முதல் மே 24 ஆம் திகதி வரையிலான காலப்பகுதியில் மொத்தம் 990,032 சுற்றுலாப் பயணிகள் நாட்டை வந்தடைந்துள்ளனர்.

வருகை தந்த வெளிநாட்டுப் பயணிகளில் பெரும்பாலானோர் இந்தியப் பிரஜைகளாவர். இக்காலப்பகுதியில் இந்தியாவிலிருந்து மட்டும் 236,916 சுற்றுலாப் பயணிகள் வருகை தந்துள்ளனர். இதற்கு மேலதிகமாக பிரித்தானியா, ரஷ்யா, ஜெர்மனி மற்றும் சீனா ஆகிய நாடுகளிலிருந்தும் கணிசமான எண்ணிக்கையிலான சுற்றுலாப் பயணிகள் வருகை தந்துள்ளதாகத் தெரிவிக்கப்பட்டுள்ளது.

இதேவேளை, மே மாதம் 1 ஆம் திகதி முதல் 24 ஆம் திகதி வரையிலான கடந்த 24 நாட்களுக்குள் மட்டும் 113,755 சுற்றுலாப் பயணிகள் இலங்கைக்கு வருகை தந்துள்ளதாக இலங்கை சுற்றுலா அபிவிருத்தி அதிகார சபை மேலும் குறிப்பிட்டுள்ளது.