வெசாக் தினத்துடன் இணைந்ததாக ஆரம்பித்தது சுற்றாடல் வாரம்: மரக்கன்று நடும் வேலைத்திட்டம் தீவிரம்

உலக சுற்றாடல் தினத்திற்கு (World Environment Day) இணைவாக ஏற்பாடு செய்யப்பட்டுள்ள தேசிய சுற்றாடல் வாரம் இன்று (30) முதல் நாடளாவிய ரீதியில் உத்தியோகபூர்வமாக ஆரம்பமாகிறது.

இன்றைய புனித வெசாக் பௌர்ணமி தினத்தை முன்னிட்டு, இதன் ஆரம்ப நிகழ்வாக ‘அடவிசி போதி மரக்கன்று பகிரும் வேலைத்திட்டம்’ இன்று காலை மல்கோன பெதியாகொட ஸ்ரீ வாபிகாராம விகாரையில் (Malkona Pediyagoda Sri Vapikaramaya) மிகச் சிறப்பாக நடைபெற்றது.

சர்வதேச ரீதியில் இம்முறை உலக சுற்றாடல் தினம் “Urgent Climate Action” என்ற தொனிப்பொருளின் கீழ் ஏற்பாடு செய்யப்பட்டுள்ளது. இதற்கு இணையாக, இலங்கை இம்முறை சுற்றாடல் தினத்தை பின்வரும் தேசிய தொனிப்பொருளின் கீழ் கொண்டாடுகின்றது:

• தேசிய தொனிப்பொருள்: “நிலைபேறான உயிர்க்கோளம் – பசுமை மாறாத வாழ்வு”

இந்த வருடத்திற்கான தேசிய சுற்றாடல் தின பிரதான விழா, அடுத்த மாதம் (ஜூன்) 5 ஆம் திகதி ஜனாதிபதி அனுர குமார திஸாநாயக்க அவர்களின் தலைமையில் மிக பிரம்மாண்டமாக நடைபெறவுள்ளமை குறிப்பிடத்தக்கது.