5 வயது சிறுமிக்கு பாலியல் தொல்லை: மாதம்பேயில் 65 வயது வர்த்தகர் பொலிஸாரால் அதிரடி கைது!

மாதம்பே, கருக்குவட்டவ பகுதியில் 5 வயது மதிக்கத்தக்க சிறுமி ஒருவருக்குப் பாலியல் தொல்லை கொடுத்ததாகக் கூறப்படும் குற்றச்சாட்டின் கீழ் 65 வயதுடைய வர்த்தகர் ஒருவர் மாதம்பே பொலிஸாரால் கைது செய்யப்பட்டுள்ளார்.

பாதிக்கப்பட்ட சிறுமி, சந்தேகநபர் நடத்தி வரும் கடைக்கு பிஸ்கட் வாங்குவதற்காகச் சென்றுள்ளார். இதன்போது, அச்சிறுமியைக் கடைக்குள் அழைத்துச் சென்று குறித்த சந்தேகநபர் இந்த பாலியல் அத்துமீறலை இழைத்துள்ளதாகப் பொலிஸாருக்குக் கிடைத்துள்ள முறைப்பாட்டில் தெரிவிக்கப்பட்டுள்ளது.

பாதிக்கப்பட்ட சிறுமியின் தாயாரால் மாதம்பே பொலிஸ் நிலையத்தில் இந்த அவசர முறைப்பாடு பதிவு செய்யப்பட்டுள்ளது. முறைப்பாட்டை அடுத்து உடனடியாகச் செயற்பட்ட மாதம்பே பொலிஸார், கருக்குவட்டவ பகுதியைச் சேர்ந்த 65 வயதுடைய கடை உரிமையாளரைக் கைது செய்துள்ளனர்.

பாலியல் தொல்லைக்குள்ளான சிறுமி தற்போது மருத்துவப் பரிசோதனைகளுக்காகச் சிலாபம் பொது வைத்தியசாலையின் சட்ட மருத்துவ அதிகாரியிடம் (JMO) ஒப்படைக்கப்பட்டு அனுமதிக்கப்பட்டுள்ளார். அத்துடன், கைது செய்யப்பட்டுள்ள வர்த்தகரைச் சிலாபம் நீதவான் முன்னிலையில் ஆஜர்படுத்துவதற்கான சட்டப்படியான ஏற்பாடுகளை மாதம்பே பொலிஸார் மேற்கொண்டு வருகின்றனர்.