டீசல் விலை குறைந்தாலும் 6 மாதங்களுக்கு பஸ் கட்டணம் குறையாது: கெமுனு விஜேரத்ன அதிரடி அறிவிப்பு!

டீசல் விலை குறைக்கப்பட்டாலும் கூட, எதிர்வரும் 6 மாத காலத்திற்கு பஸ் கட்டணத்தில் எவ்வித திருத்தங்களையும் மேற்கொள்ளப் போவதில்லை என இலங்கை தனியார் பஸ் உரிமையாளர் சங்கத்தின் தலைவர் கெமுனு விஜேரத்ன திட்டவட்டமாகத் தெரிவித்துள்ளார். கொழும்பில் இன்று (21) இடம்பெற்ற விசேட செய்தியாளர் சந்திப்பில் கலந்து கொண்டு கருத்துத் தெரிவிக்கும் போதே அவர் இந்த விடயத்தைக் குறிப்பிட்டுள்ளார்.

செய்தியாளர் சந்திப்பில் அவர் மேலும் தெரிவிக்கையில், வருடாந்த பஸ் கட்டண திருத்தத்தை எதிர்வரும் ஜூலை மாதம் 3 ஆம் திகதி முன்னெடுப்பது தொடர்பில் தற்போது ஆலோசிக்கப்பட்டு வருகின்றது. அரசாங்கத்தின் எரிபொருள் விலை சூத்திரம் மாத இறுதியில் முன்னெடுக்கப்படுவதால், அதன் அடிப்படையிலேயே பஸ் கட்டண திருத்தம் மேற்கொள்ளப்படவுள்ளது.

எனினும், ஜூலை மாதத்தில் பஸ் கட்டணத்தில் திருத்தம் செய்யப்பட்டால், அதன் பின்னரோ அல்லது அதற்கு முன்னரோ டீசல் விலை குறைக்கப்பட்டாலும் கூட, அடுத்த 6 மாதங்கள் வரை எவ்வித கட்டண திருத்தத்தையும் மேற்கொள்ளப் போவதில்லை என அவர் உறுதியாகக் கூறினார்.

ஜூன் மாதம் 1 ஆம் திகதி முதல் இதுவரையான காலப்பகுதிக்குள் தனியார் பஸ் போக்குவரத்துத் துறையானது நாளொன்றுக்கு 25 ரூபாய் வீதம் மொத்தம் 60 கோடி ரூபாய் நட்டத்தை எதிர்கொண்டுள்ளதாகக் கெமுனு விஜேரத்ன சுட்டிக்காட்டினார்.

தேசிய போக்குவரத்து ஆணைக்குழுவுடன் செய்துகொள்ளப்பட்டுள்ள உத்தியோகபூர்வ ஒப்பந்தத்தில், டீசல் விலை குறையுமானால் பஸ் கட்டணம் குறைக்கப்பட வேண்டும் என எவ்வித உள்ளடக்கமும் (விதிகளும்) இல்லை என அவர் வெளிப்படுத்தினார். இதுவரை காலமும் புரிந்துணர்வின் அடிப்படையிலேயே தாம் பஸ் கட்டணக் குறைப்புகளைச் செய்து வந்ததாகவும், இனிமேல் அவ்வாறு செய்யப் போவதில்லை என்றும் அவர் குறிப்பிட்டார். “இது குறித்து எம்மீது எவரும் வழக்குத் தொடுக்கவும் முடியும்” என கெமுனு விஜேரத்ன மேலும் சவால் விடுத்துள்ளார்.