குற்றவாளிகளுக்கு எங்கள் கட்சியில் இடமில்லை” – சஜித் பிரேமதாச அதிரடி

“எங்கள் கட்சியில் குற்றவாளிகளுக்கு இடமில்லை!” – சஜப அமைப்பாளர் சரித் அபேசிங்கவின் கைது குறித்து நாடாளுமன்றத்தில் சஜித் பிரேமதாச திட்டவட்டம்!

தவறிழைப்போருக்கும் குற்றவாளிகளுக்கும் எமது கட்சிக்குள் எவ்வித இடமும் இல்லை என்று எதிர்க்கட்சித் தலைவர் சஜித் பிரேமதாச நாடாளுமன்றத்தில் திட்டவட்டமாகத் தெரிவித்துள்ளார்.

நாடாளுமன்றத்தில் இன்று (25) உரையாற்றிய நீதி மற்றும் தேசிய ஒருமைப்பாட்டு அமைச்சர் ஹர்ஷண நாணாயக்கார, போதைப்பொருள் மற்றும் பாதாள உலக விவகாரங்களில் தற்போதைய அரசாங்கம் அனைவருக்கும் சமமாக சட்டத்தை நிலைநாட்டுவதாகக் குறிப்பிட்டார். கடந்த காலங்களில் பணமும் அதிகாரமும் படைத்தவர்கள் சட்டத்திலிருந்து தப்பித்துக் கொண்ட போதிலும், தற்போது அந்த நிலைமை மாற்றமடைந்துள்ளதாக அவர் சுட்டிக்காட்டினார்.

இதற்கு உதாரணமாக, பாதாள உலகக் குழுத் தலைவரான ‘ஹரக் கட்டா’ எனப்படும் நந்துன் சிந்தக்கவிடம் லஞ்சம் பெற்ற குற்றச்சாட்டில், சட்டத்தரணி ஒருவரும் ஐக்கிய மக்கள் சக்தியின் (SJB) ஹோரண தொகுதி அமைப்பாளரான சரித் அபேசிங்கவும் இன்று கைது செய்யப்பட்டுள்ளதை அமைச்சர் நாடாளுமன்றத்தில் வெளிப்படுத்தினார்.

“சரித் அபேசிங்கவையும் தூக்கிலிட வேண்டுமா?” இதனைத் தொடர்ந்து எதிர்க்கட்சித் தலைவரை நோக்கிக் கேள்வி எழுப்பிய அமைச்சர் ஹர்ஷண நாணாயக்கார,

“நீங்கள் போதைப்பொருளுக்கு எதிராகப் போராடுவதாகக் கூறுகிறீர்கள், சிங்கப்பூர் சட்டத்தைப் போன்று மரண தண்டனையைக் கொண்டு வர வேண்டும் என்றும் வலியுறுத்துகிறீர்கள். அப்படியென்றால், இன்று கைது செய்யப்பட்டுள்ள உங்களது கட்சியின் தொகுதி அமைப்பாளர் சரித் அபேசிங்கவையும் தூக்கிலிட வேண்டுமா?” என்று அதிரடியாக வினவினார்.

இதற்குப் பதிலளித்த எதிர்க்கட்சித் தலைவர் சஜித் பிரேமதாச, இச்சம்பவம் குறித்து கட்சி மட்டத்தில் உடனடியாக ஒழுக்காற்று விசாரணை நடத்தப்பட்டு உரிய கடுமையான நடவடிக்கை எடுக்கப்படும் என்று உறுதியளித்தார். மேலும், எக்காரணம் கொண்டும் தமது கட்சிக்குள் குற்றவாளிகளுக்கு எவ்வித வாய்ப்போ அல்லது இடமோ வழங்கப்பட மாட்டாது என்றும் அவர் சபையில் திட்டவட்டமாகக் குறிப்பிட்டார்.