இன்று மாலை மாத்தறையில் நடந்த சோகம்!

மாத்தறையில் பாரவூர்தியுடன் டிஃபெண்டர் மோதி கோர விபத்து! சாரதி சம்பவ இடத்திலேயே பலி! அறுவர் படுகாயம்!

மாத்தறை, வெல்லமடம பகுதியில் இன்று (19) மாலை இடம்பெற்ற கோர வாகன விபத்தில் டிஃபெண்டர் வாகனத்தின் சாரதி சம்பவ இடத்திலேயே உயிரிழந்துள்ளதுடன், மேலும் ஆறு பேர் படுகாயமடைந்துள்ளனர்.

தெவுந்தரவிலிருந்து மாத்தறை நோக்கிச் சென்றுகொண்டிருந்த சீமெந்து ஏற்றிய பாரவூர்தி ஒன்றும், மாத்தறையிலிருந்து தெவுந்தர நோக்கிப் பயணித்த டிஃபெண்டர் ரக வாகனமும் நேருக்கு நேர் மோதிக்கொண்டதில் இந்த விபத்து நேர்ந்துள்ளது.

விபத்தின்போது டிஃபெண்டர் வாகனத்தில் ஏழு பேர் பயணம் செய்துள்ளதாகக் காவல்துறை உறுதிப்படுத்தியுள்ளது. இந்த விபத்தில் டிஃபெண்டர் வாகனத்தைச் செலுத்திய சாரதி சம்பவ இடத்திலேயே உயிரிழந்துள்ளார்.

காயமடைந்த ஏனைய ஆறு பேரும் உடனடியாக மாத்தறை போதனா மருத்துவமனையில் அனுமதிக்கப்பட்டுள்ளனர். அவர்களில் இருவரின் நிலைமை மிகவும் கவலைக்கிடமாக உள்ளதாக மருத்துவமனை வட்டாரங்கள் தெரிவிக்கின்றன. விபத்தில் டிஃபெண்டர் வாகனம் பாரியளவில் சேதமடைந்துள்ளது.

குறித்த டிஃபெண்டர் வாகனம் இந்த குழுவினரால் ஒரு நாளைக்கு வாடகைக்கு எடுக்கப்பட்டதாக ஆரம்பகட்ட விசாரணைகளில் தெரியவந்துள்ளது. விபத்து தொடர்பான மேலதிக விசாரணைகளை மாத்தறை பொலிஸார் மேற்கொண்டு வருகின்றனர்.