சோதனைச் சாவடியில் துப்பாக்கி தவறுதலாக வெடித்ததில் இராணுவ வீரர் பலி!

மன்னார் பிரதான பால சோதனைச் சாவடியில் விபரீதம்! துப்பாக்கி தவறுதலாக வெடித்ததில் இராணுவ வீரர் பரிதாபமாக உயிரிழப்பு; பொலிஸார் விசாரணை!

மன்னார் பிரதான பாலத்திற்கு அருகில் அமைந்துள்ள இராணுவ சோதனைச் சாவடியில் கடமையில் ஈடுபட்டிருந்த இராணுவ வீரரொருவர், துப்பாக்கி தவறுதலாக வெடித்ததில் படுகாயமடைந்து சிகிச்சை பலனின்றி உயிரிழந்துள்ளார்.

விபத்து நிகழ்ந்த விதம்: இன்று (22) காலை 10.00 மணியளவில் இக்கோரச் சம்பவம் இடம்பெற்றுள்ளது. மன்னார் சவுத் பார் இராணுவ முகாமில் கடமையாற்றி வந்த 46 வயதான ஜெயத்திலக எனும் இராணுவ வீரரே இவ்வாறு விபத்தில் சிக்கி உயிரிழந்துள்ளார்.

சம்பவத்தின் போது மன்னார் பிரதான பாலத்துக்கு அருகே உள்ள சோதனைச் சாவடியில் அவர் கடமையில் இருந்துள்ளார். குறித்த சோதனைச் சாவடியில் கடமையில் ஈடுபடும் ஏனைய இராணுவ வீரர்களுக்கு அவரே துப்பாக்கிகளை வழங்கி வந்துள்ளார். அவ்வாறு துப்பாக்கிகளை விநியோகிக்க முற்பட்டபோது, பெட்டிக்குள் இருந்த துப்பாக்கி ஒன்று எதிர்பாராத விதமாகத் தவறுதலாக வெடித்தமையே இந்த விபத்திற்கு முக்கிய காரணம் எனத் தெரிவிக்கப்பட்டுள்ளது.

வைத்தியசாலையில் அனுமதி: துப்பாக்கி வெடிப்பால் படுகாயமடைந்த குறித்த இராணுவ வீரர் உடனடியாக மீட்கப்பட்டு மன்னார் மாவட்ட பொது வைத்தியசாலைக்கு கொண்டு செல்லப்பட்டார். எனினும், அங்கு அவர் சிகிச்சை பலனின்றி பரிதாபமாக உயிரிழந்துள்ளார்.

உயிரிழந்த இராணுவ வீரரின் சடலம் தற்போது மன்னார் மாவட்ட பொது வைத்தியசாலையின் பிரேத அறையில் வைக்கப்பட்டுள்ளது. இச்சம்பவம் தொடர்பான மேலதிக விசாரணைகளை மன்னார் பொலிஸார் தீவிரமாக மேற்கொண்டு வருகின்றனர்.