சீனாவில் நடைபெற்ற 7ஆவது தெற்காசிய மாநாடு: இலங்கை சார்பில் பிரதியமைச்சர் அருண் ஹேமச்சந்திரா பங்கேற்பு!

சீனாவின் ய்னான் (Yunnan) மாகாணத்தில் உள்ள குன்மிங் (Kunming) நகரில் நடைபெற்ற 7ஆவது சீனா – தெற்காசிய ஒத்துழைப்பு மன்றத்தின் (7th China South Asia Cooperation Forum) மாநாட்டில் இலங்கை சார்பில் வெளிவிவகார மற்றும் வெளிநாட்டு வேலைவாய்ப்பு பிரதியமைச்சர் அருண் ஹேமச்சந்திரா உத்தியோகபூர்வமாகப் பங்கேற்று உரையாற்றியுள்ளார்.

“அண்டை நாடுகளுடன் பகிரப்பட்ட எதிர்காலத்தைக் கொண்ட ஒரு சமூகத்திற்கான கூட்டுறவை வலுப்படுத்துதல்” (Strengthening Cooperative Partnership for a Community with a Shared Future with Neighbouring Countries) என்ற பிரதான கருப்பொருளின் கீழ் இம்மாநாடு மிகச் சிறப்பாக ஏற்பாடு செய்யப்பட்டிருந்தது.

பிரதியமைச்சரின் உரையின் முக்கிய விபரங்கள்:

• இருதரப்பு நட்புறவு: இலங்கை மற்றும் சீனா ஆகிய இரு நாடுகளுக்கும் இடையிலான பல நூற்றாண்டுகள் பழமையான கலாச்சாரம், வர்த்தகம் மற்றும் மக்கள் தொடர்புகளின் மூலம் கட்டியெழுப்பப்பட்ட உன்னதமான நட்புறவை நினைவு கூர்ந்த பிரதியமைச்சர், பிராந்திய ஒத்துழைப்பு, பரஸ்பர மரியாதை, அமைதியான சகவாழ்வு மற்றும் உள்ளடக்கிய வளர்ச்சி ஆகியவற்றில் இலங்கை உறுதியாக உள்ளதாகக் குறிப்பிட்டார்.
• பொருளாதார முதலீடுகள்: இலங்கை தற்பொழுது ஒரு நிலையான, வெளிப்படையான மற்றும் முதலீட்டாளர்களுக்கு உகந்த திறந்த பொருளாதாரத்தை உருவாக்குவதற்கு எடுத்து வரும் முயற்சிகளைச் சுட்டிக்காட்டிய அவர் வர்த்தகம், முதலீடு, சுற்றுலா, டிஜிட்டல் மாற்றம், புதுப்பிக்கத்தக்க எரிசக்தி, விவசாயம், திறன் மேம்பாடு மற்றும் நீலப் பொருளாதாரம் (Blue Economy) ஆகியவற்றில் சர்வதேச முதலீடுகளுக்கான அவசியத்தை வலியுறுத்தினார்.
• மூலோபாய இருப்பிடம்: இந்தியப் பெருங்கடலில் ஒரு மூலோபாய கடல்சார் நாடாக அமைந்துள்ள இலங்கை, தெற்காசியா, கிழக்கு ஆசியா மற்றும் உலகளாவிய சந்தைகளுக்கு இடையிலான வலுவான விநியோகத் தொடர்புகளுக்கு (Connectivity) பங்களிக்கக்கூடிய சிறந்த நிலையில் உள்ளதாக அவர் விவரித்தார்.

தெற்காசியா மற்றும் தென்கிழக்கு ஆசியாவுடனான சீனாவின் தொடர்புகளுக்கு ய்னான் (Yunnan) மாகாணம் ஒரு முக்கிய நுழைவாயிலாகத் திகழ்கிறது. எனவே, சுற்றுலா, கல்வி, விவசாயம், தேயிலை, ரத்தினக் கற்கள், சுகாதாரம், தளவாடங்கள் (Logistics), கண்டுபிடிப்புகள் மற்றும் கலாச்சார பரிமாற்றங்கள் ஆகியவற்றில் ய்னான் மாகாணத்துடன் ஆழமான ஒத்துழைப்பை ஏற்படுத்த இலங்கை பெரும் சாத்தியக்கூறுகளைக் கொண்டுள்ளதாகப் பிரதியமைச்சர் சுட்டிக்காட்டினார்.

மேலும், அமைதியான மற்றும் வளமான பிராந்திய எதிர்காலத்தை வடிவமைப்பதில் இளைஞர் ஈடுபாடு, கல்விப் பரிமாற்றங்கள், செயற்கை நுண்ணறிவு (AI), டிஜிட்டல் தொழில்நுட்பம், காலநிலை மாற்றம் மற்றும் அனர்த்த இடர் குறைப்பு ஆகியவற்றின் முக்கியத்துவத்தையும் அவர் வலியுறுத்தினார்.

பொதுவான லட்சியங்களை முன்னோக்கி கொண்டு செல்லவும், நாடுகள் ஒன்றிணைந்து வளரவும், பிராந்தியம் ஒட்டுமொத்தமாக முன்னேறவும் சீனா மற்றும் ஏனைய தெற்காசிய பங்காளிகளுடன் இணைந்து பணியாற்ற இலங்கை எப்போதும் தயாராக இருப்பதாகப் பிரதியமைச்சர் அருண் ஹேமச்சந்திரா தனது உரையில் மேலும் தெரிவித்தார்.