இறக்குமதி கொடுப்பனவுகளுக்குப் புதிய வர்த்தமானி! இன்று முதல் அமல்!

இறக்குமதி வெளிநாட்டு நாணயக் கொடுப்பனவுகளைக் கண்காணிக்கப் புதிய வர்த்தமானி! ஜனாதிபதி அநுர குமார திஸாநாயக்க இன்று முதல் அதிரடி உத்தரவு!

இலங்கையிலிருந்து மேற்கொள்ளப்படும் இறக்குமதிகள் தொடர்பான வெளிநாட்டு நாணயக் கொடுப்பனவுகளை மிகவும் திறம்படக் கண்காணிக்கும் நோக்கில், அரசாங்கம் புதிய கடுமையான ஒழுங்குமுறைகளை அறிமுகப்படுத்தி விசேட வர்த்தமானி அறிவித்தல் ஒன்றை வெளியிட்டுள்ளது.

நிதி, திட்டமிடல் மற்றும் பொருளாதார அபிவிருத்தி அமைச்சர் என்ற ரீதியில் ஜனாதிபதி அநுர குமார திஸாநாயக்கவினால், இறக்குமதி மற்றும் ஏற்றுமதி கட்டுப்பாட்டுச் சட்டத்தின் கீழ் இந்த விசேட வர்த்தமானி அறிவித்தல் வெளியிடப்பட்டுள்ளது. இந்த புதிய உத்தரவுகள் இன்று (19) முதல் நாடளாவிய ரீதியில் உடனடியாக நடைமுறைக்கு வருகின்றன.

புதிய விதிகளின்படி, இறக்குமதி பரிவர்த்தனைகளுக்காக மேற்கொள்ளப்படும் ஒவ்வொரு கொடுப்பனவுக்கும் வர்த்தக வங்கிகள் மூலம் ‘சிறப்புப் பரிவர்த்தனை எண்’ (Special Transaction Number) ஒன்று வழங்கப்பட வேண்டும். அத்துடன், அந்தப் பரிவர்த்தனைகள் தொடர்பான அனைத்து முக்கிய தகவல்களையும் இலங்கைச் சுங்கத் திணைக்களத்திற்கு (Sri Lanka Customs) அறிவிப்பதும் கட்டாயமாக்கப்பட்டுள்ளது.

அதன்படி, கீழ்வரும் விபரங்கள் வங்கிகள் மூலம் சுங்கத் திணைக்களத்திற்குத் துல்லியமாக வழங்கப்பட வேண்டும்:

• இறக்குமதியாளரின் வரி அடையாள எண் (TIN) மற்றும் முகவரி
• பயனாளர் (Beneficiary) பற்றிய முழுமையான விபரங்கள்
• வங்கி மற்றும் கிளைக் குறியீடுகள் (Bank & Branch Codes)
• கொடுப்பனவுத் தொகை மற்றும் நாணய வகை (Currency Type)
• கொடுப்பனவு மற்றும் விநியோக நிபந்தனைகள்
• கொடுப்பனவுத் திகதி மற்றும் தற்காலிக விலைப்பட்டியல் எண் (Proforma Invoice Number)
• இறக்குமதி செய்யப்படும் பொருட்களின் முழுமையான விபரங்கள்

பொருட்களை இறக்குமதி செய்வதற்கான முற்கொடுப்பனவுகளை (Advance Payments) மேற்கொள்வதற்கு முன்னர், இறக்குமதியாளர்கள் அனைவரும் இலங்கைச் சுங்கத் திணைக்களத்தில் தகுதிவாய்ந்த இறக்குமதியாளராகப் பதிவு செய்வது இனிமேல் கட்டாயமாக்கப்பட்டுள்ளது. இவ்வாறான முறையான பதிவு இல்லாத எந்தவொரு இறக்குமதியாளருக்கும், வர்த்தக வங்கிகள் மூலம் முற்கொடுப்பனவுகளை மேற்கொள்வதற்கு எவ்வித அனுமதியும் வழங்கப்பட மாட்டாது என்று புதிய ஒழுங்குமுறைகளில் திட்டவட்டமாகக் குறிப்பிடப்பட்டுள்ளது.

இந்த அதிரடி நடவடிக்கையின் மூலம் இலங்கையின் இறக்குமதித் துறையில் வெளிப்படைத்தன்மையை அதிகரிக்கவும், நாட்டிலிருந்து வெளிநாட்டு நாணயம் சட்டவிரோதமான முறையில் வெளியேறுவதை முறையாகக் கண்காணிக்கவும் அரசாங்கம் இலக்கு வைத்துள்ளதாகத் தெரிவிக்கப்பட்டுள்ளது.