நியூசிலாந்தின் ஜாம்பவான் கேன் வில்லியம்சன் சர்வதேச கிரிக்கெட்டுக்கு விடை கொடுத்தார்

நியூசிலாந்து கிரிக்கெட் அணியின் முன்னாள் கேப்டனும், உலகத்தரம் வாய்ந்த நவீன கிரிக்கெட்டின் சிறந்த துடுப்பாட்ட வீரர்களுள் ஒருவருமான கேன் வில்லியம்சன் (Kane Williamson), அனைத்து வடிவ சர்வதேச கிரிக்கெட் போட்டிகளிலிருந்தும் ஓய்வு பெறுவதாக அதிரடியாக அறிவித்துள்ளார். இந்தத் தீர்மானம் உடன் அமுலாகும் வகையில் எடுக்கப்பட்டுள்ளதாகத் தெரிவிக்கப்பட்டுள்ளது.

கடந்த 2010ஆம் ஆண்டு சர்வதேச கிரிக்கெட்டில் கால் பதித்த வில்லியம்சன், 2026 வரையிலான தனது 16 ஆண்டுகால வியத்தகு கிரிக்கெட் பயணத்தை இதன் மூலம் நிறைவு செய்துள்ளார். நியூசிலாந்து வரலாற்றில் அனைத்து வடிவ போட்டிகளிலும் சேர்த்து அதிக ஓட்டங்களை எடுத்த வீரர் என்ற வரலாற்றுச் சாதனையுடன் அவர் விடைபெறுகிறார்.

வில்லியம்சனின் ஒட்டுமொத்த சர்வதேச சாதனைப் புள்ளிவிபரங்கள்:

• விளையாடிய போட்டிகள்: 378 சர்வதேச போட்டிகள்
• குவித்த மொத்த ஓட்டங்கள்: 19,346 ஓட்டங்கள்
• சர்வதேச சதங்கள்: 48 சதங்கள்
• இரட்டைச் சதங்கள்: 6 இரட்டைச் சதங்கள்

டெஸ்ட் போட்டிகளில் அசைக்க முடியாத சாதனை: நியூசிலாந்து அணியின் மிகச்சிறந்த டெஸ்ட் துடுப்பாட்ட வீரராகக் கருதப்படும் இவர், 110 டெஸ்ட் போட்டிகளில் விளையாடி 33 சதங்கள் உட்பட 54.06 என்ற பிரம்மாண்ட சராசரியுடன் 9,515 ஓட்டங்களைக் குவித்துள்ளார் என்பது குறிப்பிடத்தக்கது.

மூன்று வடிவ கிரிக்கெட் போட்டிகளிலும் நியூசிலாந்து அணியை மிகச்சிறந்த முறையில் வழிநடத்திய வில்லியம்சன், அவரது தலைமையின் கீழ் 2019ஆம் ஆண்டு ஒருநாள் உலகக்கிண்ணம் மற்றும் 2021ஆம் ஆண்டு T20 உலகக்கிண்ணத் தொடர்களின் இறுதிப்போட்டிக்கு அணியை அழைத்துச் சென்றார். மேலும், 2021 இல் நடைபெற்ற முதலாவது ஐசிசி உலக டெஸ்ட் சாம்பியன்ஷிப் (WTC) பட்டத்தை நியூசிலாந்து அணி வென்ற போது அவரே அணியின் கேப்டனாக இருந்து சாம்பியன் மகுடத்தை உத்தியோகபூர்வமாக வென்று தந்தார்.