உலகக் கிண்ண கால்பந்து தொடரில் மாபெரும் அதிர்ச்சி

பிரேசிலை வீழ்த்தி உலகையே அதிரவைத்த நார்வே! எர்லிங் ஹாலாந்தின் மிரட்டல் கோல்களால் முதல்முறையாக கால் இறுதிக்குள் நுழைந்து சாதனை!

ஃபிஃபா (FIFA) உலகக் கிண்ண காற்பந்து தொடரின் நாக்-அவுட் சுற்றில், ஐந்து முறை சாம்பியனான பலம் வாய்ந்த பிரேசில் அணியை 2-1 என்ற கோல் கணக்கில் வீழ்த்தி நார்வே அணி வரலாற்றுச் சிறப்புமிக்க வெற்றியைப் பெற்றுள்ளது. இதன் மூலம் உலகக் கிண்ண வரலாற்றில் முதல்முறையாக நார்வே கால் இறுதிச் சுற்றுக்குத் தகுதி பெற்று சாதனை படைத்துள்ளது.

பரபரப்பான ஆட்டத்தின் முதல் பாதி கோல் எதுவுமின்றி சமநிலையில் முடிவடைந்தது. தொடர்ந்து நடைபெற்ற இரண்டாம் பாதியில் பிரேசில் அணிக்குக் கிடைத்த பொன்னான பெனால்டி வாய்ப்பை புருனோ குய்மரேஸ் (Bruno Guimaraes) தவறவிட்டார். நார்வேயின் கோல்காப்பாளர் ஒர்ஜன் நைலண்ட் (Orjan Nyland) அதனை மிகச்சிறப்பாகத் தடுத்தார். பிரேசிலின் இந்த தவறு அவர்களுக்குப் பாரிய விலையாக அமைந்தது.

ஆட்டத்தின் 79ஆவது நிமிடத்தில் நார்வேயின் நட்சத்திர வீரர் எர்லிங் ஹாலாந்த் (Erling Haaland) அண்ட்ரியாஸ் ஷெல்டெரப்பின் துல்லியமான பாஸை தலையால் முட்டி அற்புதமாக முதல் கோலை அடித்தார். அதனைத் தொடர்ந்து ஆட்டத்தின் 90ஆவது நிமிடத்தில், டி-பாக்ஸிற்கு வெளியிலிருந்து ஹாலாந்த் அடித்த வலிமையான லோ-ஸ்ட்ரைக் கோல் நார்வேயின் வரலாற்று வெற்றியை உறுதி செய்தது.

ஆட்டத்தின் கூடுதல் நேரத்தில் (Stoppage-time) பிரேசில் அணியின் நட்சத்திர வீரர் நெய்மார் (Neymar) ஒரு பெனால்டி கோல் அடித்த போதிலும், அது பிரேசிலின் தோல்வியைத் தவிர்க்கப் போதுமானதாக இருக்கவில்லை.

இந்த அதிர்ச்சித் தோல்வியின் மூலம், 1990ஆம் ஆண்டுக்குப் பிறகு முதன்முறையாக உலகக் கிண்ணத் தொடரின் கால் இறுதிச் சுற்றுக்கு முன்னேறாமல் பிரேசில் அணி ஏமாற்றத்துடன் வெளியேறியுள்ளது. வரலாற்று வெற்றியைப் பெற்றுள்ள நார்வே அணி தங்களது கால் இறுதிச் சுற்றில் இங்கிலாந்து அல்லது இணை நடத்துனர்களான மெக்சிகோ அணியை எதிர்கொள்ளவுள்ளது.