பாக்ஸ் ஆபீஸில் சாமியாடும் சூர்யா

தமிழக பாக்ஸ் ஆபீஸில் சூர்யாவின் விஸ்வரூபம்! தமிழ்நாட்டில் மட்டும் ரூ. 191 கோடிக்கும் மேல் வசூலித்து ‘கருப்பு’ திரைப்படம் இமாலய சாதனை!

திரையரங்குகளில் வெளியாகி ரசிகர்களிடையே மாபெரும் வரவேற்பைப் பெற்று, பாக்ஸ் ஆபீஸில் வரலாற்றுச் சாதனை படைத்து வரும் நடிகர் சூர்யாவின் ‘கருப்பு’ திரைப்படம், தமிழ்நாட்டில் மட்டும் ரூ. 191 கோடிக்கும் அதிகமான வசூலை ஈட்டி புதிய மைல்கல்லை எட்டியுள்ளது.

இயக்குநரும் நடிகருமான ஆர்.ஜே.பாலாஜி இயக்கத்தில், சூர்யா, த்ரிஷா, ஸ்வாசிகா மற்றும் இந்திரன்ஸ் ஆகியோரின் நடிப்பில் வெளியான இத்திரைப்படம், கோலிவுட்டில் சூர்யாவின் மிகச்சிறந்த பாக்ஸ் ஆபீஸ் கம்பேக் (Comeback) திரைப்படமாக மாறியுள்ளது. தமிழ்நாட்டின் திரையரங்குகளில் ரசிகர்களின் பேராதரவோடு வெற்றிகரமாக ஓடிய இத்திரைப்படம், தமிழ்நாட்டில் இதுவரை அதிக வசூல் செய்த 4-வது தமிழ் திரைப்படம் என்ற வரலாற்றுப் பெருமையைப் பெற்றுள்ளது.

வெளியான வெறும் 4 நாட்களிலேயே சூர்யாவின் 13 வருட முந்தைய ‘சிங்கம் 2’ திரைப்படத்தின் வாழ்நாள் வசூல் சாதனையை ‘கருப்பு’ முறியடித்தது. தொடர்ந்து அஜித்தின் ‘துணிவு’, விஜய்யின் ‘மெர்சல்’, ‘வாரிசு’ மற்றும் ரஜினிகாந்தின் ‘பேட்ட’ போன்ற முன்னணி ஹீரோக்களின் வாழ்நாள் வசூலையும் கடந்து இத்திரைப்படம் சாதனை படைத்துள்ளது.

தமிழ்நாடு மட்டுமன்றி கேரளா, ஆந்திரா மற்றும் சர்வதேச சந்தைகளிலும் இத்திரைப்படம் பிரம்மாண்ட வசூலை வாரிக்குவித்துள்ளது. கேரளா பாக்ஸ் ஆபீஸில் சூர்யாவின் திரைப்பயணத்திலேயே அதிக வசூல் செய்த படமாக இது மாறியுள்ளது. தயாரிப்பு நிறுவனமான ட்ரீம் வாரியர் பிக்சர்ஸ் (Dream Warrior Pictures) உத்தியோகபூர்வமாக வெளியிட்டுள்ள தகவலின்படி, ‘கருப்பு’ திரைப்படம் உலகளவில் ரூ. 340 கோடிக்கும் அதிகமான வசூலை (Worldwide Gross) ஈட்டி வசூல் வேட்டையை நடத்தியுள்ளது.

சாய் அபயங்கரின் அதிரடி இசையும், ஜி.கே.விஷ்ணுவின் மிரட்டலான ஒளிப்பதிவும் படத்திற்குப் பலம் சேர்த்துள்ள நிலையில், தற்போது இத்திரைப்படம் அமேசான் பிரைம் ஓடிடி (OTT) தளத்திலும் வெளியாகி உலகளாவிய சினிமா ரசிகர்களின் கவனத்தை ஈர்த்து வருகின்றமை குறிப்பிடத்தக்கது.