கற்பிட்டி கடலில் கடற்படையினரின் அதிரடி வேட்டை

கற்பிட்டி கடற்பரப்பில் 9 இலட்சத்திற்கும் அதிகமான சட்டவிரோத மருந்து மாத்திரைகள் பறிமுதல்! கடற்படையினரால் ஒருவர் அதிரடி கைது!

சட்டவிரோதமான முறையில் இலங்கைக்குள் கடத்தி வர முயன்ற ஒன்பது லட்சத்து முப்பத்தைந்தாயிரம் (935,000) மருந்து மாத்திரைகளுடன் டிங்கி படகு ஒன்றையும், சந்தேகநபர் ஒருவரையும் இலங்கை கடற்படையினர் அதிரடியாகக் கைது செய்துள்ளனர்.

கடந்த 2026 ஜூன் 30 ஆம் திகதி, வடமேற்கு கடற்படை கட்டளையகத்தைச் சேர்ந்த இலங்கை கடற்படைக் கப்பலான ‘விஜய’வின் அதிகாரிகள் குழுவினரால் கற்பிட்டி, இப்புன்தீவு கடல் பகுதியில் விசேட தேடுதல் நடவடிக்கையொன்று முன்னெடுக்கப்பட்டிருந்தது. இதன்போது, அக்கடற்பகுதியில் பயணித்துக்கொண்டிருந்த சந்தேகத்திற்கிடமான டிங்கி படகு ஒன்றை மறித்து அதிகாரிகள் சோதனையிட்டனர்.

: குறித்த சோதனையின் போது, படகில் மிகவும் நுணுக்கமாக மறைத்து வைக்கப்பட்டு, சட்டவிரோதமான முறையில் நாட்டுக்குள் கொண்டுவர முயன்ற 935,000 மருந்து மாத்திரைகள் அடங்கிய பெரும் கையிருப்பு கடற்படையினரால் கண்டுபிடிக்கப்பட்டுப் பறிமுதல் செய்யப்பட்டது.

இந்த அதிரடி நடவடிக்கையின் போது கைது செய்யப்பட்ட சந்தேகநபர் கற்பிட்டி, குரக்கன்ஹேன பிரதேசத்தைச் சேர்ந்த 35 வயதுடையவர் என அடையாளம் காணப்பட்டுள்ளார்.

கைது செய்யப்பட்ட சந்தேகநபர், கடத்தலுக்குப் பயன்படுத்தப்பட்ட டிங்கி படகு மற்றும் பறிமுதல் செய்யப்பட்ட பெருந்தொகையான மருந்து மாத்திரைகள் அனைத்தும் மேலதிக சட்ட நடவடிக்கைகளுக்காகப் புத்தளம் பொலிஸ் போதைப்பொருள் தடுப்புப் பிரிவினரிடம் (Narcotics Bureau) கடற்படையினரால் ஒப்படைக்கப்பட்டுள்ளன. இது தொடர்பான மேலதிக விசாரணைகளைப் பொலிஸார் தீவிரமாக முன்னெடுத்து வருகின்றனர்.