மறு அறிவித்தல் வரை ஈரானுக்குப் பயணம் செய்ய வேண்டாம்: இந்தியத் தூதரகம் விடுத்துள்ள அதிதீவிர எச்சரிக்கை

ஈரானில் தீவிரமடைந்து வரும் போர் மற்றும் மோதல் சூழ்நிலைகளைக் கருத்திற்கொண்டு, மறு அறிவித்தல் வரும் வரை ஈரானுக்குப் பயணம் செய்வதைத் தவிர்க்குமாறும், தற்போது அங்கு வசிக்கும் இந்தியர்களை உடனடியாக அங்கிருந்து வெளியேறுமாறும் அறிவுறுத்தி இந்தியா இன்று (08) புதிய அவசரப் பயண ஆலோசனையை விடுத்துள்ளது.

இந்திய வெளியுறவு அமைச்சகத்துடன் (MEA) ஒருங்கிணைந்து, ஈரானின் டெஹ்ரானில் உள்ள இந்திய தூதரகம் இந்த அவசர ஆலோசனையை உத்தியோகபூர்வமாக வெளியிட்டுள்ளதாக சர்வதேச ஊடகங்கள் செய்தி வெளியிட்டுள்ளன.

அவசரப் பயண ஆலோசனையின் விபரங்கள்: மத்திய கிழக்கு பிராந்தியத்தில் இஸ்ரேல் மற்றும் ஈரான் இடையே கடந்த 24 மணித்தியாலங்களில் ஏவுகணைத் தாக்குதல்கள் மற்றும் வான்வழித் தாக்குதல்கள் தீவிரமடைந்துள்ளன. இந்த அச்சுறுத்தல்களுக்கு மத்தியில், எந்தவொரு காரணத்திற்காகவும் ஈரானுக்குச் செல்வதை முழுமையாகத் தவிர்க்குமாறு இந்தியத் தூதரகம் தனது குடிமக்களைக் கேட்டுக்கொண்டுள்ளது.

மேலும், தற்போது ஈரானில் தங்கியிருக்கும் இந்தியப் பிரஜைகள் (மாணவர்கள், வணிகர்கள் மற்றும் சுற்றுலாப் பயணிகள்) தங்களின் பாதுகாப்பைக் கருதி, உடனடியாகக் கிடைக்கும் வர்த்தக விமானங்கள் அல்லது இதர போக்குவரத்து வழிகளைப் பயன்படுத்தி பாதுகாப்பான நாடுகளுக்கோ அல்லது இந்தியாவிற்கோ திரும்புவதற்கான அவசர ஏற்பாடுகளை மேற்கொள்ளுமாறும் அறிவுறுத்தப்பட்டுள்ளனர்.