உலக சந்தை விலை நீடித்தால் ஆகஸ்ட் அல்லது செப்டம்பரில் எரிபொருள் விலை குறையும்! தற்போதும் பாரிய மானியம் வழங்கப்படுகிறது: அமைச்சர் பிமல் ரத்நாயக்க!
உலக சந்தையில் நிலவும் எரிபொருள் விலையானது தற்போதைய மட்டத்திலேயே தொடர்ந்து நீடிக்குமாயின், எதிர்வரும் ஆகஸ்ட் அல்லது செப்டம்பர் மாதமளவில் அதன் விலைச் சலுகைகளை நாட்டு மக்களுக்கு வழங்க முடியும் எனப் போக்குவரத்து, நெடுஞ்சாலைகள் மற்றும் நகராட்சி அபிவிருத்தி அமைச்சர் பிமல் ரத்நாயக்க தெரிவித்துள்ளார். எரிபொருள் விற்பனை மூலம் இலாபம் ஈட்டும் நோக்கம் தற்போதைய அரசாங்கத்திற்கு இல்லை என்றும் அமைச்சர் சுட்டிக்காட்டியுள்ளார்.
டீசல் மற்றும் பெற்றோலுக்கான தற்போதைய மானியங்கள்: தற்போதைய சூழல் குறித்து அமைச்சர் மேலும் கருத்துத் தெரிவிக்கையில், அரசாங்கம் நஷ்டங்களுக்கு மத்தியிலும் மக்கள் நலனைக் கருத்திற்கொண்டு ஒவ்வொரு லீற்றர் டீசலுக்கும் சுமார் 100 ரூபாவையும், ஒரு லீற்றர் பெற்றோலுக்கு சுமார் 20 ரூபாவையும் மானியமாக (Subsidy) மக்களுக்கு வழங்கி வருவதாகக் குறிப்பிட்டார்.
விலைக்குறைப்பு உடனடியாக சாத்தியமற்றது ஏன்? எரிபொருள் கொள்வனவு என்பது சாதாரண சந்தையில் அல்லது கடைகளில் பொருட்களை உடனடியாக வாங்குவதைப் போன்றதல்ல என்று குறிப்பிட்ட அமைச்சர், அது முறையான சர்வதேச டெண்டர் நடைமுறைகளின்படி, முன்கூட்டியே ஒப்புக் கொள்ளப்பட்ட விலையிலேயே கொள்வனவு செய்யப்பட வேண்டும் என்பதைச் சுட்டிக்காட்டினார்.
“இதே உலக சந்தை விலை நிலைமை நீடித்தால் ஆகஸ்ட் அல்லது செப்டம்பர் மாதமளவில் மக்களுக்கு ஒரு சிறந்த சலுகையை வழங்க முடியும் என நாம் நம்புகிறோம். நாட்டின் பொருளாதாரத்திற்கும் அது அவசியமாகும். நாட்டின் பொருளாதாரத்தின் மேல் மட்டத்தை நாம் முறையாகக் கட்டியெழுப்பியிருப்பதனாலேயே இவை அனைத்தையும் எம்மால் செய்ய முடிந்துள்ளது. எங்களால் முடிந்தவரை விரைவில் எரிபொருள் விலையைக் குறைக்குமாறு நாமும் அதிகாரிகளிடம் கோரியுள்ளோம்” என அமைச்சர் பிமல் ரத்நாயக்க மேலும் தெரிவித்தார்.
