உலகக் கிண்ண கால்பந்து: சுவீடனுடன் மோதிய ஆட்டத்தை சமநிலை செய்தது ஜப்பான்! துனிசியாவை 3-1 என வீழ்த்தி நெதர்லாந்து அபார வெற்றி!
உலகக் கிண்ண கால்பந்தாட்டத் தொடரின் ‘எப்’ குழுவுக்கான (Group F) விறுவிறுப்பான லீக் ஆட்டங்கள் இன்று அதிகாலை நடைபெற்றன. இதில் ஜப்பான் மற்றும் சுவீடன் அணிகள் மோதிய போட்டி 1-1 என்ற கோல் கணக்கில் சமநிலையில் நிறைவடைந்ததுடன், மற்றொரு போட்டியில் நெதர்லாந்து அணி 3-1 எனத் துனிசியாவை வீழ்த்தி அபார வெற்றி பெற்றது.
ஜப்பான் VS சுவீடன் (ஆட்டம் சமநிலை): இன்று காலை 4.30 மணிக்கு ஆரம்பமான இப்போட்டியில் தொடக்கம் முதலே இரு அணிகளும் சமபலத்துடன் மோதின. இதனால் முதல் பாதி ஆட்டத்தில் இரு அணிகளாலும் கோல் எதுவும் அடிக்க முடியவில்லை.
இடைவேளைக்குப் பிறகு தாக்குதல் ஆட்டத்தை தீவிரப்படுத்திய ஜப்பான் அணி, 56 ஆவது நிமிடத்தில் தனது முதல் கோலை அடித்து 1-0 என முன்னிலை பெற்றது. எனினும், இதற்கு விரைவாகப் பதிலடி கொடுத்த சுவீடன் அணி, 62 ஆவது நிமிடத்தில் ஒரு கோல் அடித்து ஆட்டத்தை 1-1 என சமநிலைக்கு கொண்டு வந்தது. இறுதிவரை வெற்றிக்கான 2 ஆவது கோலை அடிக்க இரு அணி வீரர்களும் போராடியும் பலன் கிடைக்காததால் போட்டி 1-1 என சமநிலையானது.
நெதர்லாந்து VS துனிசியா (நெதர்லாந்து வெற்றி): இதே குழுவுக்கான மற்றொரு லீக் ஆட்டத்தில் நெதர்லாந்து அணி, துனிசியாவை 3-1 என்ற கோல் கணக்கில் வீழ்த்தி அசத்தியது. ஆட்டத்தின் 3 ஆவது நிமிடத்திலேயே துனிசியா வீரர் எல்லீஸ் ஸ்கிரி தவறுதலாக ‘ஓன் கோல்’ (Own Goal) அடித்ததால் நெதர்லாந்து 1-0 என எளிதாக முன்னிலை பெற்றது. தொடர்ந்து 7 ஆவது நிமிடத்தில் நெதர்லாந்து வீரர் பிரையன் ப்ரோபி மற்றுமொரு கோல் அடித்து முன்னிலையை 2-0 ஆக உயர்த்தினார்.
இரண்டாம் பாதியின் 54 ஆவது நிமிடத்தில் துனிசியாவின் ஹசெம் மஸ்தூரி கோல் அடித்து, கோல் வித்தியாசத்தை 2-1 ஆகக் குறைத்தார். எனினும், ஆட்டத்தின் 62 ஆவது நிமிடத்தில் நெதர்லாந்தின் ஜோன் பால் வான் ஹெக்கே கோல் அடித்து அணியின் வெற்றியை 3-1 என உறுதி செய்தார்.
