குற்றப் புலனாய்வுத் திணைக்களத்தின் (CID) தற்போதைய பணிப்பாளர், சிரேஷ்ட பொலிஸ் அத்தியட்சகர் ஷாணி அபேசேகரவை, 2020 ஓகஸ்ட் 25 ஆம் திகதி முதல் நடைமுறைக்கு வரும் வகையில் பிரதி பொலிஸ் மா அதிபர் (DIG) பதவிக்கு தரம் உயர்த்துமாறு நிர்வாக மேன்முறையீட்டு தீர்ப்பாயம் தேசிய பொலிஸ் ஆணைக்குழுவிற்கு கட்டளையிட்டுள்ளது.
தமக்கு உரிய காலத்தில் கிடைக்க வேண்டிய பதவி உயர்வை வழங்காமைக்கு எதிராக ஷாணி அபேசேகர தாக்கல் செய்திருந்த மேன்முறையீட்டை நீண்டகாலமாக விசாரித்த பின்னரே இந்தத் தீர்ப்பு வழங்கப்பட்டுள்ளது.
1986 இல் உப பொலிஸ் பரிசோதகராகச் சேவையில் இணைந்த ஷாணி அபேசேகர, தனது திறமையால் படிப்படியாக உயர்ந்து 2017 இல் CID பணிப்பாளராகப் பொறுப்பேற்றார். எனினும், 2019 ஜனாதிபதித் தேர்தலின் பின்னர் அரசியல் அழுத்தங்கள் காரணமாக அவர் அங்கிருந்து மாற்றப்பட்டு, காலி பிரதி பொலிஸ் மா அதிபரின் தனிப்பட்ட உதவியாளராகத் தரம் இறக்கப்பட்டார்.
பின்னர், 2020 இல் குரல் பதிவுகள் தொடர்பாகப் பணி இடைநீக்கம் செய்யப்பட்ட அவர், பொதுத் தேர்தலுக்குச் சில நாட்களுக்கு முன்னர் கைது செய்யப்பட்டு 10 மாதங்கள் விளக்கமறியலில் வைக்கப்பட்டார். அவர் மீதான கைது ஒரு “திட்டமிடப்பட்ட புனைவு” என மேன்முறையீட்டு நீதிமன்றம் பின்னர் சுட்டிக்காட்டியிருந்தது.
2020 முதல் 2024 வரையான காலப்பகுதியில் அவருக்கு எதிராக சுமார் 20 விசாரணைகள் முன்னெடுக்கப்பட்ட போதிலும், அனைத்துக் குற்றச்சாட்டுகளிலிருந்தும் அவர் விடுவிக்கப்பட்டார். இதனையடுத்து, 2023 இல் அவருக்கு நிலுவைச் சம்பளத்தை வழங்கவும், முழுமையான ஓய்வூதியத்துடன் ஓய்வுபெறச் செய்யவும் பொலிஸ் ஆணைக்குழு தீர்மானித்திருந்தது.
இலங்கையை உலுக்கிய பல முக்கிய குற்றச்செயல்களைத் துப்புத்துலக்கிய பெருமை ஷாணி அபேசேகரவையே சாரும். அவற்றுள் சில:
- றோயல் பார்க் கொலைச் சம்பவம்
- அங்குலானை இரட்டைக்கொலை
- பாரத லக்ஷ்மன் பிரேமச்சந்திர கொலை
- டவுன் ஹால் மற்றும் பித்தல சந்தை குண்டுவெடிப்புச் சம்பவங்கள்
தற்போது அரசாங்கத்தின் விசேட ஒப்பந்த அடிப்படையில் மீண்டும் CID பணிப்பாளராகப் பணியாற்றி வரும் ஷாணி அபேசேகரவுக்கு, இந்தத் தீர்ப்பு ஒரு மாபெரும் அங்கீகாரமாக அமைந்துள்ளது.
சமீபத்திய செய்திகளை உடனுக்குடன் தெரிந்துகொள்ள எமது சமூக வலைதளப் பக்கங்களுடன் இணைந்திருங்கள்:
- 🟢 WhatsApp Channel: இணைந்து கொள்ளுங்கள்
- 👍 Facebook Page: விருப்பம் (Like) செய்யுங்கள்
- 📱 TikTok: பின்தொடருங்கள் (Follow)
