உலகில் அதிக ரசிகர்களைக் கொண்ட விளையாட்டுத் திருவிழாவான 23வது உலகக்கிண்ண கால்பந்தாட்டத் தொடர் மெக்ஸிகோ, கனடா மற்றும் அமெரிக்கா ஆகிய 3 நாடுகளில் தலா 48 அணிகளின் பங்கேற்புடன் மிகவும் பிரம்மாண்டமாக நடைபெற்று வருகிறது.
இத்தொடரின் 11ஆவது லீக் ஆட்டத்தில் குரூப் ‘F’ பிரிவில் இடம்பெற்றுள்ள பலம் வாய்ந்த நெதர்லாந்து மற்றும் ஜப்பான் அணிகள் இன்று நேருக்கு நேர் மோதின. ஆரம்பம் முதலே விறுவிறுப்பாக நகர்ந்த இந்த ஆட்டத்தின் முதல் பாதியில் இரு அணி வீரர்களும் கோல் அடிக்க எடுத்த முயற்சிகள் பலனளிக்காததால், முதல் பாதி எவ்வித கோல்களுமின்றி பூஜ்ஜியத்திற்கு பூஜ்ஜியம் (0-0) என்ற கணக்கில் நிறைவடைந்தது.
இதனைத் தொடர்ந்து ஆரம்பமான ஆட்டத்தின் இரண்டாவது பாதி, ரசிகர்களுக்குப் பெரும் விருந்தாக அமைந்தது. ஆட்டத்தின் 50ஆவது நிமிடத்தில் நெதர்லாந்து அணியின் நட்சத்திர வீரர் வெர்ஜில் வான் டைக் (Virgil van Dijk) அற்புதமாக ஒரு கோலை அடித்து தனது அணியை 1-0 என முன்னிலைப்படுத்தினார். எனினும், அதற்குப் பதிலடி கொடுக்கும் வகையில் ஆட்டத்தின் 57ஆவது நிமிடத்தில் ஜப்பான் வீரர் கெய்ட்டோ நாகமுரா (Keito Nakamura) அதிரடியாக ஒரு கோலை அடித்து ஆட்டத்தை 1-1 என சமநிலைக்குக் கொண்டு வந்தார்.
தொடர்ந்து ஆக்ரோஷமாக விளையாடிய நெதர்லாந்து அணி, 64ஆவது நிமிடத்தில் கிரைசென்சியோ சம்மர்வில்லி (Crysencio Summerville) அடித்த கோல் மூலம் 2-1 என மீண்டும் முன்னிலை பெற்றது. போட்டி நெதர்லாந்து வசம் செல்லும் என எதிர்பார்க்கப்பட்ட வேளையில், ஆட்டத்தின் இறுதிக்கட்டமான 88ஆவது நிமிடத்தில் ஜப்பான் அணியின் டைசி காமடா (Daichi Kamada) மிகச் சாதுரியமாக ஒரு கோலை அடித்து நெதர்லாந்து ரசிகர்களுக்கு அதிர்ச்சியளித்தார்.
இதனால் இரு அணிகளும் 2-2 என்ற கோல் கணக்கில் சமநிலையைப் பெற்றன. இறுதிவரை இரு அணிகளும் மேலும் கோல் அடிக்காததால், ஆட்டம் 2-2 என்ற கணக்கில் சமநிலையில் முடிவடைந்தது. இந்தத் த்ரில் சமநிலையை அடுத்து இரு அணிகளுக்கும் தலா 1 புள்ளி வீதம் பகிர்ந்து வழங்கப்பட்டது.
