“அரசாங்கம் எதிர்பார்ப்பது எதிரிகளற்ற அரசியல் களத்தை; இது ஹிட்டலரின் நாசிசத்திற்கு மட்டுமே சமம்!” – முன்னாள் எம்பி சஞ்சீவ எதிரிமான்ன அதிரடி குற்றச்சாட்டு!
தற்போதைய அரசாங்கம் எதிர்பார்ப்பது தனக்கு எதிராளிகளே இல்லாத ஒரு வெற்று அரசியல் களத்தை மட்டுமே என்றும், இது ஒருபோதும் ஜனநாயகத்திற்கு சமமானதல்ல, மாறாக ஹிட்டலரின் நாசிசத்திற்கு (Nazism) மட்டுமே சமமானது என்றும் ஸ்ரீலங்கா பொதுஜன பெரமுனவின் முன்னாள் நாடாளுமன்ற உறுப்பினர் சஞ்சீவ எதிரிமான்ன தெரிவித்துள்ளார்.
இன்று (15) நடைபெற்ற ஊடகவியலாளர் சந்திப்பொன்றில் கலந்துகொண்டு உரையாற்றும் போதே அவர் இந்த கடுமையான குற்றச்சாட்டுகளை முன்வைத்தார்.
தமது கட்சியின் கார்டர்களால் (Cadre) அனைத்தும் கட்டுப்படுத்தப்படும் ஒரு விசித்திரமான அரசாங்க மாடலை இந்த அரசாங்கம் சமூகத்திற்கு அச்சுறுத்தும் வகையில் முன்மொழிந்துள்ளதாக அவர் குற்றம் சாட்டினார். அரசாங்கத்தைப் பிரதிநிதித்துவப்படுத்தும் பிரதி அமைச்சர் ஒருவர் அண்மையில் உரையாற்றும்போது, “நாங்கள் அரசாங்க அதிகாரத்தைக் கைப்பற்றியுள்ளோம், ஆனால் இன்னும் அரச அதிகாரத்தை எமது கைக்குள் எடுக்கவில்லை” என்று குறிப்பிட்டிருந்ததை சஞ்சீவ எதிரிமான்ன சுட்டிக்காட்டினார்.
ஜனாதிபதி பதவி, பிரதமர் பதவி, அமைச்சுப் பதவிகள், நாடாளுமன்ற அதிகாரம், மாகாண ஆளுநர்கள் மற்றும் உள்ளூராட்சி மன்றங்களின் அதிகாரம் என அத்தனையையும் தன்வசம் வைத்துள்ள போதிலும், அதுமட்டும் தமக்கு போதுமானதல்ல என்பதையே அரசாங்கம் காட்ட முற்படுவதாக அவர் தெரிவித்தார். மேலும், கிராம உத்தியோகத்தர், பிரதேச செயலாளர், அரசாங்க அதிபர் போன்ற நிர்வாகப் பதவிகளையும் மக்கள் விடுதலை முன்னணியின் (JVP) கார்டர்களே வழிநடத்த வேண்டும் என்று அவர்கள் எண்ணுவதாக அவர் சுட்டிக்காட்டினார்.
அன்று அடோல்ஃப் ஹிட்டலர் தனது நாசிசக் கொள்கைக்கு ‘தேசிய சோசலிசம்’ என்று ஒரு அழகான பெயரைச் சூட்டியிருந்ததைப் போல, தற்போதைய அரசாங்கமும் தங்களின் கொடூரமான அரசியல் திட்டங்களுக்கு அழகான வார்த்தைகளைச் சேர்த்து இவ்வாறான கூற்றுகளை முன்வைத்து வருவதாக சஞ்சீவ எதிரிமான்ன மேலும் தெரிவித்தார்.
