வீதியில் ‘ஹெட்போன்’ பயன்படுத்தும் பாதசாரிகளுக்கு இனி நீதிமன்ற நடவடிக்கை! ஸ்ரீலங்கா பொலிஸார் அதிரடி எச்சரிக்கை!
கொழும்பு: வீதிகளில் நடந்து செல்லும்போது ஹெட்போன் (Headphones) அல்லது இயர்போன் (Earphones) மூலம் இசை கேட்டுக்கொண்டு அல்லது அலைபேசியில் பேசிக்கொண்டு செல்லும் பாதசாரிகளுக்கு எதிராக இனிவரும் காலங்களில் கடுமையான சட்ட நடவடிக்கை எடுக்கப்படும் என ஸ்ரீலங்கா பொலிஸார் கடுமையான எச்சரிக்கை விடுத்துள்ளனர்.
இது குறித்துப் போக்குவரத்துக் கட்டுப்பாடு மற்றும் வீதிப் பாதுகாப்புப் பிரிவின் பணிப்பாளர், சிரேஷ்ட பொலிஸ் அத்தியட்சகர் (SSP) மனோஜ் ரணகல தெரிவிக்கையில், தற்போது இவ்வாறான ஆபத்தான முறையில் பயணிக்கும் பாதசாரிகளுக்கு எச்சரிக்கை மாத்திரமே விடுக்கப்பட்டு வருவதாகக் குறிப்பிட்டார். எனினும், வீதிகளில் கவனக்குறைவு காரணமாக விபத்து அபாயங்கள் நாளுக்கு நாள் அதிகரித்து வருவதால், எதிர்காலத்தில் இவ்வாறான நபர்களுக்கு எதிராக நேரடியாக நீதிமன்ற நடவடிக்கை (Court Action) ஆரம்பிக்கப்படும் என்று அவர் சுட்டிக்காட்டினார்.
எதிர்வரும் ஜூலை 6 ஆம் திகதி முதல் 10 ஆம் திகதி வரை நடைபெறவுள்ள 11ஆவது தேசிய விபத்துத் தடுப்பு வாரத்தை முன்னிட்டு, சுகாதார மேம்பாட்டுப் பணியகத்தில் நேற்று நடைபெற்ற விசேட ஊடகவியலாளர் சந்திப்பிலேயே அவர் இந்த அதிரடி விபரங்களை வெளியிட்டார்.
வீதிகளில் பயணிக்கும்போது சுற்றுப்புறச் சத்தங்கள் மற்றும் வாகனங்களின் ஹோர்ன் ஓசைகள் கேட்காதவாறு ஹெட்போன்களைப் பயன்படுத்துவது பாரிய விபத்துக்களுக்கு வழிவகுப்பதாகப் பாதுகாப்புப் பிரிவினர் சுட்டிக்காட்டியுள்ளனர். எனவே, பொதுமக்கள் வீதி ஒழுங்குமுறைகளைப் பேணி, தமது உயிரைப் பாதுகாத்துக் கொள்ளுமாறு பொலிஸார் மேலும் கேட்டுக்கொண்டுள்ளனர்.
