டெங்கு பரவலைக் கட்டுப்படுத்த புதிய அவசர தொலைபேசி இலக்கம் அறிமுகம்! ஆபத்தான இடங்கள் குறித்து பொதுமக்கள் அறிவிக்க நடவடிக்கை!
நாட்டில் அதிகரித்து வரும் டெங்கு பரவலைக் கட்டுப்படுத்தும் நோக்கில், பொதுமக்கள் தங்கள் பகுதிகளில் டெங்கு நுளம்புகள் பெருகக்கூடிய இடங்கள் குறித்துத் தகவல்களை அறிவிப்பதற்காக 011 796 6366 என்ற புதிய அவசர தொலைபேசி இலக்கம் அறிமுகப்படுத்தப்பட்டுள்ளது.
‘கிளீன் ஸ்ரீலங்கா’ வேலைத்திட்டத்தின் மேலதிக செயலாளர் இதுகுறித்துத் தெரிவிக்கையில், நீர் தேங்கும் பாத்திரங்கள், கழிவுகள், பழைய டயர்கள் போன்ற டெங்கு நுளம்புகள் பெருகக்கூடிய ஆபத்தான இடங்கள் குறித்து இந்த இலக்கத்தின் ஊடாக டெங்கு நிவாரண மையத்திற்குப் பொதுமக்கள் நேரடியாக அறிவிக்க முடியும் எனக் குறிப்பிட்டுள்ளார்.
பொதுமக்களிடம் இருந்து பெறப்படும் தகவல்களின் அடிப்படையில், சம்பந்தப்பட்ட இடங்களுக்குச் சுகாதார அதிகாரிகள் மற்றும் டெங்கு கட்டுப்பாட்டுக் குழுக்கள் உடனடியாக அனுப்பி வைக்கப்படுவர் என அதிகாரிகள் தெரிவித்துள்ளனர். அதன் மூலம் அந்தப் பகுதிகளில் உடனடிச் சுத்திகரிப்பு நடவடிக்கைகள் மற்றும் விழிப்புணர்வு வேலைத்திட்டங்கள் முன்னெடுக்கப்படும் என்றும் அவர்கள் மேலும் குறிப்பிட்டுள்ளனர்.
