கண்டி: 2026 டி20 உலகக் கிண்ணக் கிரிக்கெட் தொடரில் இன்று நடைபெற்று வரும் ஓமான் அணிக்கு எதிரான லீக் போட்டியில், இலங்கை அணி அபாரமான துடுப்பாட்டத்தை வெளிப்படுத்தி 225 ஓட்டங்களைக் குவித்துள்ளது.
நாணயச் சுழற்சியில் வெற்றி பெற்று முதலில் துடுப்பெடுத்தாடிய இலங்கை அணி, ஆரம்பம் முதலே ஓமான் பந்துவீச்சாளர்களைத் திணறடித்தது. அதிரடியாக விளையாடிய குசல் மெண்டிஸ் 61 ஓட்டங்களைப் பெற்று வலுவான அடித்தளமிட்டார்.
குசல் மெண்டிஸைத் தொடர்ந்து களமிறங்கிய இளம் வீரர் பவன் ரத்நாயக்க, நிதானமாகவும் அதேநேரம் அதிரடியாகவும் விளையாடி 60 ஓட்டங்களை விளாசினார்.
ஆட்டத்தின் இறுதி ஓவர்களில் அதிரடி காட்டிய அணித்தலைவர் தசுன் ஷானக்க, ஓமான் பந்துவீச்சை நாலாபுறமும் சிதறடித்து 50 ஓட்டங்களை வேகமாகப் பெற்றுக்கொண்டார். இவர்களின் சிறப்பான ஆட்டத்தினால் இலங்கை அணி நிர்ணயிக்கப்பட்ட 20 ஓவர்கள் நிறைவில் 5 விக்கெட்டுகளை மாத்திரம் இழந்து 225 ஓட்டங்கள் என்ற இமாலய ஸ்கோரை எட்டியது.
இதன்படி, ஓமான் அணி வெற்றி பெறுவதற்கு 226 ஓட்டங்கள் என்ற கடினமான இலக்கு நிர்ணயிக்கப்பட்டுள்ளது. பல்லேகல மைதானத்தின் ஆடுகளம் துடுப்பாட்டத்திற்கு சாதகமாக இருப்பதால், இலங்கை பந்துவீச்சாளர்கள் ஆரம்பத்திலேயே விக்கெட்டுகளை வீழ்த்தினால் மாத்திரமே இலகுவான வெற்றியைப் பெற முடியும்.
