தமிழ் மக்களின் முக்கிய கலாசார மற்றும் இலக்கிய விழாவான “கம்பன் விழா” நேற்று (03) பிற்பகல் வெள்ளவத்தை ராமகிருஷ்ணா மண்டபத்தில் மிகவும் சிறப்பாக நடைபெற்றது. இந்த நிகழ்வில் ஜனாதிபதி அநுர குமார திசாநாயக்க அவர்கள் பிரதம அதிதியாகக் கலந்துகொண்டார்.

சிறந்த தமிழ் கவிஞர்களில் ஒருவரான கம்பரின் பெயரில் அகில இலங்கை கம்பன் கழகம் 1980 ஆம் ஆண்டு யாழ்ப்பாணத்தில் நிறுவப்பட்டது. இந்த அமைப்பு தமிழ் மொழி மற்றும் கலாசாரத்தை மேம்படுத்தும் நோக்கில் தொடர்ச்சியான பணிகளை முன்னெடுத்து வருகிறது.

ஜனாதிபதியின் கருத்துக்கள்

நிகழ்வில் உரையாற்றிய ஜனாதிபதி அநுர குமார திசாநாயக்க அவர்கள், இலக்கியம், நடனம் மற்றும் இசை என்பவற்றை அடிப்படையாகக் கொண்டு, இளைய தலைமுறையினரை கலாசார விழுமியங்கள் மற்றும் தேசப்பற்றுடன் கூடிய தர்மத்தின் வழியில் வழிநடத்துவதற்கு கம்பன் கழகம் ஆற்றிவரும் சேவையை பெரிதும் பாராட்டினார்.

“இலக்கியம் மற்றும் கலைகள் மூலம் இளைஞர்களை நல்வழிப்படுத்துவது எமது கலாசார விழுமியங்களைப் பாதுகாக்கும் முக்கிய படியாகும்.”

இந்த நிகழ்வின் போது கம்பன் கழகத்தின் சார்பில் ஜனாதிபதி கௌரவிக்கப்பட்டமை குறிப்பிடத்தக்கது.