சர்வதேச கிரிக்கெட் அரங்கில் அதிவேகமாக 28,000 ஓட்டங்களைக் கடந்த முதல் வீரர் என்ற உலக சாதனையை இந்திய அணியின் நட்சத்திர துடுப்பாட்ட வீரர் விராட் கோஹ்லி படைத்துள்ளார்.
நியூசிலாந்து அணிக்கு எதிராக வதோதராவில் நேற்று (11) நடைபெற்ற முதலாவது ஒருநாள் சர்வதேசப் போட்டியின் போது அவர் இந்த மைல்கல்லை எட்டினார். இப்போட்டியில் 93 ஓட்டங்களைப் பெற்ற கோஹ்லி, தனது 624-வது இன்னிங்ஸிலேயே இந்த இமாலயச் சாதனையை நிகழ்த்தியுள்ளார்.
சச்சின், சங்கக்காரவின் சாதனைகள் முறியடிப்பு: இதற்கு முன்னர் இந்திய அணியின் முன்னாள் ஜாம்பவான் சச்சின் டெண்டுல்கர் 644 இன்னிங்ஸ்களிலும், இலங்கை அணியின் முன்னாள் கேப்டன் குமார் சங்கக்கார 666 இன்னிங்ஸ்களிலும் 28,000 ஓட்டங்களைக் கடந்ததே சாதனையாக இருந்தது. தற்போது கோஹ்லி இவர்களின் சாதனையை முறியடித்து முதலிடத்தைப் பிடித்துள்ளார்.
அதிக ஓட்டங்கள் குவித்தவர்கள் பட்டியலில் இரண்டாம் இடம்: இந்தச் சாதனையின் மூலம் சர்வதேச கிரிக்கெட்டில் அதிக ஓட்டங்கள் குவித்த வீரர்கள் பட்டியலில் குமார் சங்கக்காரவை (28,016 ஓட்டங்கள்) பின்னுக்குத் தள்ளி கோஹ்லி இரண்டாம் இடத்தைப் பிடித்துள்ளார். முதலிடத்தில் 34,357 ஓட்டங்களுடன் சச்சின் டெண்டுல்கர் நீடிக்கிறார்.
