நாட்டின் பொருளாதாரத்தின் உயிர்நாடியாக விளங்கும் நுண், சிறிய மற்றும் நடுத்தர தொழில்முனைவோர் (MSME) பாரிய கடன் பொறியில் சிக்கியுள்ளதாகத் தெரிவித்துள்ள எதிர்க்கட்சித் தலைவர் சஜித் பிரேமதாச, அவர்களைப் பாதுகாக்க வங்கிகள் ஈட்டிய மிகை லாபத்தின் ஒரு பகுதியைச் சலுகையாக வழங்க வேண்டும் என அரசாங்கத்தை வலியுறுத்தியுள்ளார்.
எதிர்க்கட்சித் தலைவர் தனது உரையில் சுட்டிக்காட்டிய முக்கிய புள்ளிவிவரங்கள்:
- வேலைவாய்ப்பு: நாட்டில் சுமார் 11 இலட்சம் தொழில்முனைவோர் காணப்படுவதுடன், அவர்கள் 45 இலட்சம் பேருக்கு வேலைவாய்ப்புகளை வழங்குகின்றனர்.
- பொருளாதார பங்களிப்பு: மொத்த உள்நாட்டு உற்பத்தியில் (GDP) 52% பங்களிப்பை இவர்களே நல்குகின்றனர்.
- தொழில் வீழ்ச்சி: 2022 தரவுகளின்படி, 263,000 தொழில்முயற்சிகள் மூடப்பட்டுள்ளன. மேலும் 150,000 முயற்சிகள் வங்குரோத்தடைந்துள்ளன.
நாட்டின் கடனைச் செலுத்த 2028 வரை சலுகை காலம் கிடைத்துள்ள போதிலும், சிறு தொழில்முயற்சியாளர்களுக்கு ‘பராட்டே’ (Parate) சட்ட அமுலாக்கத்திலிருந்து தற்காலிக நிவாரணம் மட்டுமே கிடைத்துள்ளது. இவர்களது கடன்கள் இன்னும் முறையாக மறுசீரமைக்கப்படவில்லை என சஜித் பிரேமதாச சுட்டிக்காட்டினார்.
சஜித் பிரேமதாச முன்வைத்துள்ள கோரிக்கைகள்:
- வங்கிகளின் மிகை லாபம்: அசாதாரண சூழ்நிலையிலும் வங்கிக் கட்டமைப்பு ஈட்டியுள்ள மிகை லாபத்தில் ஒரு பகுதியை, நட்டத்தில் இருக்கும் தொழில்முனைவோருக்கு நிவாரணமாக வழங்க வேண்டும்.
- கடன் மறுசீரமைப்பு: ஆசிய அபிவிருத்தி வங்கி வழங்கிய 100 மில்லியன் டொலர் நிவாரணம் உட்பட ஏனைய கடன் திட்டங்களை சாதாரண தொழில்முனைவோரும் எளிதாகப் பெற்றுக்கொள்ள வழிவகை செய்ய வேண்டும்.
- நடைமுறைச் சாத்தியமான தீர்வு: தொழில்முனைவோர் அவர்கள் செய்த தவறால் வீழ்ச்சியடையவில்லை, நாட்டின் பொருளாதாரச் சூழலாலேயே பாதிக்கப்பட்டுள்ளனர். எனவே, அரசாங்கம் தெளிவானதொரு கடன் சலுகைத் திட்டத்தை உடனடியாக அமுல்படுத்த வேண்டும்.
