ஈரானிய வான்பரப்பில் சுட்டு வீழ்த்தப்பட்ட அமெரிக்காவின் F-15E Strike Eagle போர் விமானத்திலிருந்து மாயமான ஒரு அமெரிக்கப் படைவீரர், உயிருடன் மீட்கப்பட்டுள்ளதாக சர்வதேச ஊடகங்கள் செய்தி வெளியிட்டுள்ளன.
கடந்த வெள்ளிக்கிழமை (ஏப்ரல் 3, 2026) தெற்கு ஈரானில் இந்த விமானம் வீழ்த்தப்பட்டதைத் தொடர்ந்து, அதில் பயணித்த இரு வீரர்களைத் தேடும் பணி மிகத் தீவிரமாக முன்னெடுக்கப்பட்டது.
அமெரிக்கப் பாதுகாப்பு அமைச்சகமான பென்டகன் மற்றும் சி.என்.என் (CNN) செய்திகளின்படி, விமானத்திலிருந்த இரு வீரர்களில் ஒருவர் ஏற்கனவே மீட்கப்பட்டு பாதுகாப்பான இடத்திற்கு மாற்றப்பட்டுள்ளார். தற்போது வெளியாகியுள்ள தகவல்களின்படி, மாயமான மற்றைய வீரரும் அமெரிக்கச் சிறப்புப் படைகளின் (Special Forces) அதிரடி நடவடிக்கையின் மூலம் ஈரானிய எல்லைக்குள் இருந்து மீட்கப்பட்டுள்ளார்.
விமானம் வீழ்த்தப்பட்டவுடன், பாராசூட் மூலம் குதித்த வீரர்கள் ஈரானியப் படையினரிடம் சிக்காமல் இருக்க அடர்ந்த காட்டுப்பகுதிகள் மற்றும் மலைப் பிரதேசங்களில் மறைந்திருந்துள்ளனர். இவர்களை உயிருடன் பிடித்துத் தருபவர்களுக்கு ஈரான் அரசாங்கம் “பெரிய சன்மானம்” வழங்கப்படும் என அறிவித்திருந்தது. இந்த இக்கட்டான நிலையில், அமெரிக்காவின் HH-60 Pave Hawk ஹெலிகொப்டர்கள் மற்றும் C-130 விமானங்கள் ஈரானிய வான்பரப்பிற்குள் மிகத் தாழ்வாகப் பறந்து இந்த மீட்புப் பணியைச் சாத்தியமாக்கியுள்ளன.
இந்த மீட்பு நடவடிக்கை குறித்து கருத்துத் தெரிவித்த அமெரிக்க ஜனாதிபதி டொனால்ட் ட்ரம்ப், ஈரானுக்கு ஏற்கனவே 48 மணிநேர அவகாசம் வழங்கப்பட்டுள்ளதை நினைவுபடுத்தினார். ஹோர்முஸ் நீரிணையை (Strait of Hormuz) மீண்டும் திறக்காவிட்டால் ஈரான் மீது “நரகமே இறங்கும்” (Hell will reign down) என அவர் கடும் எச்சரிக்கை விடுத்துள்ளார்.
கடந்த ஐந்து வாரங்களாக நீடித்து வரும் இந்த அமெரிக்க – ஈரான் போரில், அமெரிக்கப் போர் விமானம் ஒன்று ஈரானிய மண்ணில் வீழ்த்தப்படுவது இதுவே முதல் முறையாகும். இந்தச் சம்பவம் இரு நாடுகளுக்கும் இடையிலான போரை மேலும் தீவிரப்படுத்தும் என அஞ்சப்படுகிறது.
#ELankaMirror #USIranWar #F15Downed #RescueMission #DonaldTrump #BreakingNews #TamilNews #LankaMirror #Tehran #MiddleEastCrisis
