ஐசிசி T20 உலகக்கிண்ணத் தொடரின் இறுதிப் போட்டியில் நியூசிலாந்து அணியை 96 ஓட்டங்களால் வீழ்த்தி இந்திய அணி மூன்றாவது முறையாக உலக சாம்பியனாக முடிசூடியுள்ளது. அஹமதாபாத் நரேந்திர மோடி மைதானத்தில் இன்று (08) நடைபெற்ற இப்போட்டியில் முதலில் துடுப்பாடிய இந்திய அணி, உலகக்கிண்ண இறுதிப் போட்டி வரலாற்றில் அதிகபட்ச ஓட்டங்களான 255 ஓட்டங்களைக் (5 விக்கெட் இழப்பிற்கு) குவித்து சாதனை படைத்தது.
இந்திய அணி சார்பில் அதிரடியாக விளையாடிய சஞ்சு சாம்சன் 89 ஓட்டங்களையும், இஷான் கிஷன் 54 ஓட்டங்களையும், அபிஷேக் சர்மா 52 ஓட்டங்களையும் பெற்று பலமான இலக்கை நிர்ணயித்தனர். தொடர்ந்து 256 ஓட்டங்கள் என்ற இமாலய இலக்கை நோக்கிப் பதிலுக்குத் துடுப்பாடிய நியூசிலாந்து அணி, இந்திய வீரர் ஜஸ்பிரித் பும்ராவின் (4 விக்கெட்டுகள்) அனல் பறக்கும் பந்துவீச்சை எதிர்கொள்ள முடியாமல் 159 ஓட்டங்களுக்குச் சகல விக்கெட்டுகளையும் இழந்து தோல்வியைத் தழுவியது. இதன் மூலம் டி20 உலகக்கிண்ண வரலாற்றில் அதிகமுறை கிண்ணம் வென்ற அணி என்ற பெருமையை இந்தியா பெற்றுள்ளது.
